Biofizika İnstitutunda Zəfər Günü qeyd olunub

AR Elm və Təhsil Nazirliyinin Biofizika İnstitutunun Yeni Azərbaycan Partiyası (YAP) özək təşkilatının və Gənc Alim və Mütəxəssislər Şurasının (GAMŞ) təşkilatçılığı ilə 8 noyabr – Zəfər Gününə həsr olunmuş tədbir keçirilib.

Əvvəlcə torpaqlarımızın işğaldan azad edilməsi uğrunda canını vətən yolunda sipər edən, öz canı-qanı bahasına şanlı Zəfər tariximizi yazan, bizlərə qələbə sevincini bəxş edən bütün şəhidlərimizin, həmçinin Tərtər, Bərdə və Gəncədə terror aktı nəticəsində dünyasını dəyişən yüzlərlə dinc sakinin əziz xatirəsi bir dəqiqəlik sükutla yad edilib.

Tədbiri giriş nitqi ilə açan institutun baş direktoru, AMEA-nın müxbir üzvü Oktay Qasımov əməkdaşları qarşıdan gələn 8 Noyabr – Zəfər Günü münasibətilə təbrik edib. Diqqətə çatdırıb ki, Azərbaycan Respublikasının Prezidenti, Ali Baş Komandan cənab İlham Əliyevin rəhbərliyi ilə qüdrətli Azərbaycan ordusunun böyük şücaət və yüksək peşakarlıqla apardığı 44 günlük döyüş əməliyyatları nəticəsində 30 ilə yaxın müddət ərzində işğal altında qalan əzəli və əbədi torpaqlarımız düşmən tapdağından azad edildi. “Bu parlaq tarixi qələbə ilə müzəffər ordumuz tərəfindən həm birinci, həm də ikinci Qarabağ müharibəsi şəhidlərimizin, terror qurbanı olan mülki vətəndaşlarımızın  intiqamı mənfur düşməndən alınmış oldu”, – deyə O.Qasımov qeyd edib.

Daha sonra Biofizika İnstitutunun Molekulyar və hüceyrə biokimyası laboratoriyasının kiçik elmi işçisi Banu Ağamalıyeva çıxış edərək 2020-ci il sentyabr ayının 27-dən başlayan və 44 gün davam edən müharibədə cəmiyyətimizin nümayiş etdirdiyi səfərbərlikdən, xalq-ordu-dövlət birliyindən, qazanılan qələbələrdən, qəhrəman igidlərimizin müharibə dövründə göstərdikləri şücaətdən danışıb.

Gənc alimin çıxışı Zəfər Gününə həsr olunmuş videoçarxın nümayişi ilə davam edib.

05 Noyabr 2022

Paylaş