Biofizika İnstitutunda Xocalı soyqırımına həsr olunmuş anım tədbiri keçirilib

Elm və Təhsil Nazirliyinin Biofizika İnstitutunda Xocalı faciəsinin 31-ci ildönümü ilə əlaqədar tədbir keçirilib.

Əvvəlcə Xocalı soyqırımının, eləcə də canlarını Vətənin müdafiəsi və azadlığı uğrunda fəda edən bütün şəhidlərin əziz xatirəsi bir dəqiqəlik sükutla yad edilib.

Anım tədbirində giriş sözü ilə çıxış edən institutun baş direktoru, AMEA-nın müxbir üzvü Oktay Qasımov bildirib ki, Azərbaycan xalqının dəhşətli faciələrindən biri olan Xocalı soyqırımı erməni millətçilərinin və onların havadarlarının xalqımıza qarşı apardığı etnik təmizləmə siyasətinə xidmət edirdi. O, Xocalı soyqırımını bütün insanlığa və bəşəriyyətə qarşı törədilmiş cinayət adlandıraraq, bu faciə iə bağlı həqiqətlərin dünya ictimaiyyətinə çatdırılmasının, eləcə də qan yaddaşımızın unudulmaması üçün belə anım tədbirlərinin keçirilməsinin əhəmiyyətini vurğulayıb.

Tədbirdə, həmçinin institutun Sənədlərlə iş şöbəsinin müdiri, Qadınlar şurasının sədri Əsmər Məmmədova çıxış edərək ermənilərin Xocalıda törətdikləri qanlı cinayətlərdən, Xocalı soyqırımının təfərrüatlarından, bu soyqırımın dünya xalqlarına  tanıdılması istiqamətində görülən işlərdən danışıb. 

Sonda soyqırım qurbanlarının xatirəsinə həsr olunmuş video-çarx nümayiş etdirilib.

24 Fevral 2023

Paylaş