Biofizika İnstitutunda “Heydər Əliyev ili”nə həsr olunmuş elmi seminar keçirilib

AR Elm və Təhsil Nazirliyinin Biofizika İnstitutunda “Heydər Əliyev ili”nə həsr olunmuş “Kationik anti-xərçəng Glu-Gln-Arg-Pro-Arg peptidinin müxtəlif zülallarla qarşılıqlı təsirinin molekulyar dokinq metodu ilə tədqiqi və onun lipid monotəbəqəsinə təsir mexanizmi” mövzusunda elmi seminar keçirilib.

Seminarı giriş sözü ilə institutun baş direktoru, AMEA-nın müxbir üzvü Oktay Qasımov açaraq ölkəmiz üçün əlamətdar il olan “Heydər Əliyev İli”ndə Azərbaycan xalqının Ümummilli Lideri Heydər Əliyevin anadan olmasının 100 illiyi ilə bərabər, onun həyat yoldaşı, görkəmli oftalmoloq alim, akademik Zərifə xanım Əliyevanın da 100 illik yubileyinin ölkəmizin hər yerində silsilə tədbirlərlə qeyd olunduğunu vurğulayıb. Bildirib ki, bu əlamətdar il ilə bağlı institutda da növbəti elmi seminarların keçirilməsi nəzərdə tutulub.

Sonra çıxış etmək üçün söz institutun Gənc Alim və Mütəxəssislər Şurasının sədri, Molekulyar və hüceyrə biokimyası laboratoriyasının elmi işçisi Mətanət Baxışovaya verilib. Kationik pentapeptidinin Glu-Gln-Arg-Pro-Arg (EQRPR) əhəmiyyətli dərəcədə anti-xərçəng fəaliyyəti olan xərçəng əleyhinə peptidlər ailəsinə aid olduğunu qeyd edən məruzəçi bildirib ki, tədqiqatlardan əvvəl peptidin bu fəaliyyəti həyata keçirməsi mexanizmi məlum olmayıb, lakin sonra laboratoriyada bu istiqamətdə aparılan elmi-tədqiqat işlərində Glu-Gln-Arg-Pro-Arg pentapeptidinin əczaçılıq profili araşdırılaraq, in silico molecular docking tədqiqatlarında onun anti-xərçəng xüsusiyyətləri aşkar edilib. M.Baxışova, həmçinin əlavə edib ki, aparılan elmi-tədqiqat işlərində bundan başqa, DPPC (dipalmitoyl phosphatidylcholine) monotəbəqəsinə EQRPR-ın təsiri Langmuir monotəbəqə texnikası ilə tədqiq olunub və nəticələr qarşılıqlı təsirlər baxımından müzakirə edilib. Belə ki, bağlama mexanizmlərini qiymətləndirmək üçün pentapeptid və onun müxtəlif amin turşusu ilə əvəzlənmiş analoqları həm epidermal böyümə faktoru reseptoruna (EGFR tirozin kinaz), həm də proto-onkogen tirozin protein kizan (FYN) ilə bağlanması araşdırılıb, tədqiqatlar zamanı alınan mühüm nəticələr 5.235 impakt faktoruna malik Q1 kvartil kateqoriyalı “Biomolecular Structure and Dynamics” jurnalında dərc edilib.

Sonda məruzə ətrafında suallar cavablandırılıb, müzakirələr aparılıb.

20 Aprel 2023

Paylaş