Biofizika İnstitutunun baş direktoru, AMEA-nın müxbir üzvü Oktay Qasımov Avropa Şurasının “HORİZON 2020” (H2020 MARİE SKTODOWKSA-CURE, LungCARD) proqramı üzrə Azərbaycan Səhiyyə Nazirliyinin Milli Onkologiya Mərkəzində (MOM) işgüzar səfərdə olan Portuqaliyanın STAB VIDA kompaniyasının kimyəvi proseslər və biotexnologiya üzrə mütəxəssisi Karla Klimenta ilə görüşüb.

Görüşdə MOM-un əməkdaşı, Molekulyar və hüceyrə onkologiyası laboratoriyasının rəhbəri, b.ü.f.d. Leylaxanım Məlikova, Biofizika İnstitutunun icraçı direktoru, b.e.d. Kərim Qasımov, baş meneceri, t.ü.f.d. Azad Əbdürəhimov və İnteqrativ biologiya laboratoriyasın müdiri, AMEA-nın müxbir üzvü İlham Şahmuradov da iştirak ediblər.

Görüş zamanı proqram çərçivəsində hazırlanan DrVİDA adlı cihazın istifadəsi ilə yeni metodların tətbiqinə dair müzakirələr aparılıb. Portuqaliyalı tədqiqatçı K.Klimenta bildirib ki, proyektin əsas məqsədi ağciyər adenokarsinomasının yaranmasına səbəb olan mutasiyaların və müalicə zamanı əmələ gələ bilən yeni mutasiyaların aşkarlanmasıdır. Qeyd olunub ki, sınaq işlərində nümunələrin hazırlanması, eləcə də test zamanı optimal şəraitin seçilməsi böyük əhəmiyyət kəsb etdiyindən STAB VİDA kompaniyası iki DrVİDA cihazını və onun işi üçün lazım olan reagentləri MOM-da saxlayıb.

Qeyd edək ki, üçtərəfli əməkdaşlıq sayəsində cihazın optimal şəraitdə istifadəsi üzrə tədqiqatların aparılması və alınan nəticələri cihazın iş protokoluna salınması nəzərdə tutulub.