Biofizika İnstitutunun Elmi şurasının iclası keçirilib

Biofizika İnstitutunun Elmi şurasının növbəti iclası keçirilib.

İclası institutun baş direktoru, AMEA-nın müxbir üzvü Oktay Qasımov açaraq Şura üzvlərini gündəlikdəki məsələlərlə tanış edib.

O, Azərbaycan Respublikasında 2023-cü ilin “Heydər Əliyev İli” elan edilməsi haqqında Azərbaycan Respublikasının Prezidenti İlham Əliyevin 29 sentyabr 2022-ci il tarixli Sərəncamından irəli gələn vəzifələri şura üzvlərinin diqqətinə çatdırıb. Sözügedən Sərəncamın icrasına uyğun olaraq, institutda ulu öndər Heydər Əliyevin həyat və yaradıcılıq irsinə dair tədbirlərin keçirilməsi ilə bağlı müvafiq tapşırıqlar verib.

Sonra AMEA-nın və respublikanın digər elm və ali təhsil müəssisələrində cari ildə aparılmış elmi-tədqiqat işlərinin yekunlarına dair AMEA Rəyasət Heyətinin 30 sentyabr 2022-ci il tarixli qərarından irəli gələn tapşırıqlar müzakirə olub. Məsələ ilə bağlı institutun elmi katibi, dosent Florida Mehrəliyeva çıxış edərək, müvafiq hesabatların hazırlanması ilə bağlı laboratoriya rəhbərlərinə məlumat verib.

Daha sonra Biofizika İnstitutunun elmlər doktoru hazırlığı üzrə doktorantı, b.ü.f.d. Leylaxanım  Məlikovanın attestasiyasının nəticəsi müzakirə olunaraq təsdiqlənib.

İclasda, həmçinin Biofizika İnstitutunun icraçı direktoru, biologiya elmləri doktoru Kərim Qasımovun İnteqrativ biologiya laboratoriyasının müdiri, AMEA-nın müxbir üzvü İlham Şahmuradovla birlikdə oktyabr ayının 3-dən 7-dək Gürcüstana elmi ezamiyyəti üzrə hesabatı dinlənilib. Alim qeyd edib ki, ezamiyyət çərçivəsində Tbilisi şəhərində Avropa Birliyi və ABŞ Dövlət Departamentinin birgə təşkil etdiyi Mərkəzi Asiya və Qafqazda Biotəhlükəsizlik Assosiasiyasının “COVİD-19: Lessons Learned” mövzusunda beynəlxalq elmi konfransında iştirak etməklə yanaşı, onlar NCDC/R.Lugar mərkəzinin fəaliyyəti ilə də yaxından tanış olublar və elmi-tədqiqat sahəsində əməkdaşlıq imkanları barədə səmərəli müzakirələr aparıblar.

Sonda institutun I və II kurs magistrantlarının dərslərinin gedişatı haqqında Şura üzvlərinə məlumat verilib. Professor Oktay Qasımov qeyd edib ki, cari ilin tədris prosesinin keyfiyyətinin  yoxlanılması məqsədi ilə magistrantlarla mütəmadi olaraq görüşlər təşkil olunacaq.

14 Oktyabr 2022

Paylaş