Biofizika İnstitutunda Samara Universitetinin professoru ilə görüş keçirilib

Biofizika İnstitutunun baş direktoru, AMEA-nın müxbir üzvü Oktay Qasımov Samara Universitetinin Optika və spektroskopiya kafedrasının professoru Kotova Svetlana Pavlovna ilə görüşüb.

Dəyirmi masa ətrafında keçən görüşdə, həmçinin Biofizika İnstitutunun icraçı direktoru, b.e.d. Kərim Qasımov, baş meneceri, t.ü.f.d. Azad Əbdürəhimov, elmi katibi, b.ü.f.d., dosent Florida Mehrəliyeva, Biomolekulların strukturu, dinamikası və funksiyası laboratoriyasının aparıcı elmi işçisi, f.-r.ü.f.d., dosent Rasim Aslanov, Ekoloji biofizika laboratoriyasının aparıcı elmi işçisi, b.ü.f.d., dosent Sevinc Cəfərova, Bakı Dövlət Universitetinin Fizika fakültəsinin Optika və molekulyar fizika kafedrasının müdiri, professor Rəna Qasımova, Bakı Dövlət Universitetinin Fizika Problemləri Elmi-Tədqiqat İnstitutunun aparıcı elmi işçisi Qəzənfər Bayramov, Fizika İnstitutunun böyük elmi işçisi Abbas İmaməliyev, ADNSU-nin Energetika fakültəsinin dosenti, f.-r.ü.f.d. İbrahim Abbasov iştirak ediblər.

Görüş zamanı Oktay Qasımov qonağa Biofizika İnstitutunda onkoloji və neyrodegenerativ xəstəliklər istiqamətində aparılan tədqiqatların mühüm elmi əhəmiyyətindən, həyata keçirilən müştərək layihələrdən, əldə olunan nailiyyətlərdən söz açıb. Bundan əlavə, tərəflər arasında gələcək əlaqələrin qurulması və birgə elmi-tədqiqatların aparılması, habelə digər müştərək layihələrin keçirilməsi ilə bağlı fikir mübadiləsi aparılıb.

Daha sonra Svetlana Kotova institutun laboratoriyalarını gəzib, burada prioritet istiqamətlərdə müasir avadanlıqlarla aparılan elmi tədqiqat işləri barədə məlumatlandırılıb, alimlərin səmərəli fəaliyyətinin təmin edilməsi üçün yaradılan şəraiti yüksək qiymətləndirib.

04 Noyabr 2022

Paylaş