Biofizika İnstitutunda “Qadınlar və qızlar elmdə” beynəlxalq gününə həsr olunmuş tədbir keçirilib

Elm və Təhsil Nazirliyinin Biofizika İnstitutunun Qadınlar Şurasının və Gənc Alim və Mütəxəssislər Şurasının təşkilatçılığı ilə 11 fevral - “Qadınlar və qızlar elmdə” beynəlxalq gününə həsr olunmuş tədbir keçirilib.

Tədbirdə Gənc Alim və Mütəxəssislər Şurasının sədri, Molekulyar və hüceyrə biokimyası laboratoriyasının elmi işçisi Mətanət Baxışova çıxış edərək qadınların cəmiyyətdəki çoxşaxəli rolundan, elmin müxtəlif sahələrində Nobel mükafatına layiq görülmüş qadın alimlərdən bəhs edib.

Sonra institutun Sənədlərlə iş şöbəsinin müdiri, Qadınlar şurasnın sədri Əsmər Məmmədovanın məruzəsi dinlənilib. Məruzəçi zərif cinsin nümayəndələrinin ölkəmizin aparıcı sahələrində tutduqları mövqelərindən, onların milli-mənəvi dəyərlərimizin qorunub saxlanmasında və təbliğində aparıcı rolu olduğunu vurğulayaraq Azərbaycan tarixində Zərifə Əliyeva, Aida İmanquliyeva, Sara Aşurbəyli kimi silinməz izlər qoyan görkəmli qadın şəxsiyyətlərimizin mədəniyyətimizə, elmimizə bəxş etdikləri töhfələr barədə məlumat verib.

Sonda Biofizika İnstitutunun baş direktoru, AMEA-nın müxbir üzvü Oktay Qasımov elm sahəsində çalışan qadınları beynəlxalq gün münasibətilə təbrik edib, onlara həyat və fəaliyyətlərində müvəffəqiyyət arzulayıb.

09 Fevral 2023

Paylaş